2012 թվականի ապրիլի 22-ին ժամը 12:30-14:00-ն Երեւանի Թեքեյան կենտրոնի մեծ դահլիճում տեղի ունեցավ ՀՌԱԿ 22-րդ արտահերթ հանրապետական պատգամավորական ժողովը (համագումարը): Համգումարը վարելու համար ընտրված ժողովի ատենապետ Կարեն Կակոյանը տեղեկացրեց, որ ՀՌԱԿ 22-րդ արտահերթ համագումարը 19-րդ արտահերթ հանրապետական պատգամավորական ժողովի համար սահմանված քվոտայով հրավիրվել է ՀՌԱԿ 13 շրջանակներից 10-ի պահանջով` ապահովելով ձայների 2/3-ը, որն ՀՌԱԿ Կանոնադրության հոդված 72-ի «դ» կետի պահանջ է: ՀՌԱԿ մանդատային Հանձնաժողովի նախագահ Անահիտ Չորեքչյանի հաղորդմամբ ՀՌԱԿ 22-րդ արտահերթ համագումարին ներկա են 153 պատգամավորներ: Բաց քվեարկությամբ համագումարը միաձայն որակվեց օրինական եւ իրավազոր, քանի որ ներկա են 19-րդ արտահերթ հանրապետական պատգամավորական ժողովի համար սահմանված քվոտայով պատգամավորների անհրաժեշտ 2/3-ից էլ առավել պատգամավորներ (ՀՌԱԿ կանոնադրության հոդված 77): Օրակարգի հարցերը`

ՀՌԱԿ վերակազմակերպման միջոցով միաձուլման մասին,

ՀՌԱԿ ատենապետ Էդվարդ Անտինյանի որպես ՀՌԱԿ գործադիր մարմնի ղեկավարի լիազորությունների դադարեցման մասին,

ՀՌԱԿ նոր ատենապետի եւ Հանրապետական վարչության ընտրություններ, Միաձուլման պայմանագրի եւ Փոխանցման ակտի նախագծի հաստատման մասին, ՀՌԱԿ եւ ԱրմենականՌԱԿ համատեղ համագումարին մասնակցելու մասին:

Որոշվեց`

ՀՌԱ եւ Արմենական-ՌԱ կուսակցությունները վերակազմակերպման միջոցով միաձուլել նոր հիմնադրվող Ռամկավար Ազատական Կուսակցությունում (Հայաստան):

ՀՌԱԿ Կանոնադրության 76, 84 հոդվածների պահանջների համաձայն Հարություն Առաքելյանին հեռացնել կուսակցության շարքերից:

2004 թվականին ՀՌԱԿ Հանրապետական Վարչության որոշմամբ, կուսակցության շարքերից անհիմն եւ անօրեն հեռացված Ռուբեն Միրզախանյանին, Գայանե Մուրադյանին, Շամիրամ Աղաբեկյանին (հետմահու), Լավրենտի Բարսեղյանին եւ Սերգեյ Գալստյանին վերականգնել կուսակցության շարքերում:

Համագումարն ընտրեց ՀՌԱԿ Հանրապետական նոր վարչություն: Համագումարի պատգամավորներից ընտրվեցին Միավորիչ համագումարի 50 պատգամավորներ:

ՀՌԱԿ XXII արտահերթ Հանրապետական Պատգամավորական ժողովը հանձնարարեց եւ լիազորեց նորընտիր ՀՌԱԿ Հանրապետական վարչությանը, մամուլում հայտարարություն տալուց հետո առնվազն մեկ ամսից, կազմակերպել ՌԱԿ (Հայաստան) հիմնադիր` ՀՌԱԿ եւ Արմենական-ՌԱԿ վերակազմակերպման միջոցով միալձուլման միասնական հանրապետական պատգամավորական ժողովը (համագումարը):

2012 թվականի ապրիլի 22-ին ժամը 15:00-16:00-ն Երեւանի Թեքեյան կենտրոնի մեծ դահլիճում տեղի ունեցավ Արմենական-ՌԱԿ 3-րդ արտահերթ հանրապետական պատգամավորական ժողովը: Համագումարը վարելու համար ընտրված ժողովի ատենապետ Սուրեն Սարգսյանը տեղեկացրեց, որ Արմենական-ՌԱԿ 3-րդ արտահերթ համագումարը հրավիրված է կուսակցության կանոնադրության համապատասխան կետերի բոլոր պահանջների համաձայն, հետեւապես` օրինական է: Ներկայացել էին 80 պատգամավորներից 76-ը: Քվեարկությամբ համագումարը միաձայն որակվեց օրինական եւ իրավազոր:

Օրակարգի հարցերը`

1. Արմենական-ՌԱԿ եւ ՀՌԱԿ միավորման մասին (զեկուցողՙ ատենապետ Հակոբ Ավետիքյան):

2. Միավորման պայմանագրի նախագծի ներկայացում (զեկուցողՙ Սիրո Գեւորգյան):

3. Փոխանցման ակտի ներկայացում (զեկուցող Գայանե Մուրադյան):

Որոշվեց`

1. Արմենական-ՌԱ եւ ՀՌԱ կուսակցությունները վերակազմակերպման միջոցով միաձուլվել նոր հիմնադրվող Ռամկավար Ազատական Կուսակցությունում (Հայաստան):

2. Արմենական-ՌԱԿ 3-րդ արտահերթ հանրապետական պատգամավորական ժողովը հանձնարարեց եւ լիազորեց Հանրապետական վարչությանը, մամուլում հայտարարություն տալուց հետո առնվազն մեկ ամսից կազմակերպել ՌԱԿ (Հայաստան) հիմնադիր` ՀՌԱԿ եւ Արմենական-ՌԱԿ վերակազմակերպման միջոցով միալձուլման միասնական հանրապետական պատգամավորական ժողովը (Համագումարը):

3. Համագումարի պատգամավորներից ընտրվեցին Միավորիչ համագումարի 50 պատվիրակներ:

ՀՌԱԿ ՀԱՆՐԱՊԵՏԱԿԱՆ ՎԱՐՉՈՒԹՅՈՒՆ

Ապրիլի 22-ին Երեւանում, Թեքեյան կենտրոնում տեղի ունեցավ Հայաստանի Ռամկավար ազատական կուսակցության (ՀՌԱԿ ) արտահերթ XXII համագումարը: Համագումարը կուսակցության շարքերից հեռացրեց նախկին ատենապետ Հարություն Առաքելյանինՙ կուսակցության գույքը ապօրինի կերպով օտարելու եւ կուսակցականին ոչ վայել եւ անպատասխանատու պահվածքի համար:

ՀՌԱԿ ՀԱՆՐԱՊԵՏԱԿԱՆ ՎԱՐՉՈՒԹՅՈՒՆ
ԱՐՄԵՆԱԿԱՆ-ՌԱԿ ՀԱՆՐԱՊԵՏԱԿԱՆ ՎԱՐՉՈՒԹՅՈՒՆ

ՀՌԱԿ եւ Արմենական-ՌԱԿ Հանրապետական վարչությունները ապրիլի 25-ին կայացած համատեղ նիստում` հենվելով ապրիլի 22-ին գումարված ՀՌԱԿ 22-րդ արտահերթ հանրապետական եւ նույն օրը տեղի ունեցած Արմենական-ՌԱԿ 3-րդ արտահերթ համագումարների որոշումների վրա, հայտարարում են, որ վերակազմակերպման միջոցով միաձուլման եւ մեկ-միասնական կուսակցության ստեղծման համար, ՌԱԿ (Հայաստան) հիմնադիր-պատգամավորական համագումարը տեղի կունենա 2012թ. հունիսի 3-ին, ժամը 13.00-ին, Թեքեյան Կենտրոնի (Խանջյան 50) մեծ սրահում:

Սույնը ընդունել իբրեւ պաշտոնական ծանուցում ուղղված երկու կուսակցությունների ապրիլի 25-ի համագումարներումՙ հիմնադիր-պատգամավորական համագումարի համար ընտրված պատվիրակներին:

Արմեն Միկոյանը շուրջ 25 մասնակիցներից մեկն է, որի աշխատանքները մինչեւ մարտի 19 ցուցադրվելու են Թեքեյան կենտրոնում: Նրա 2 նկարն էլ մարդկային հոգեվիճակի պատկերում են գույնի ու գծի միջոցով:

Արմենը Վանաձորից է, սովորում է Գեղարվեստի ակադեմիայում, իր ծրագրերից ու նկարներից շատ խոսել չի սիրում, իսկ նկարները գնահատում է հետեւյալ կերպ. «Եթե նայողը նկարը չի զգում, ուրեմն նկարը չի ստացվել»:

Արմենի նկարների կողքին ցուցադրվում են նաեւ արդեն պրոֆեսիոնալ նկարիչների գործերը` ի դեմս Ղարիբյան Սամվելի, որը Նկարիչների միության անդամ է, եւ նրա գործերը ցուցադրվել են տարբեր երկրներում:

Ցուցահանդեսի մասնակիցներն ընտրվել են անկախ տարիքից, սեռից ու ներկայացրած աշխատանքների թեմատիկայից: Նախաձեռնությունն Արմենական-Ռամկավար ազատական կուսակցության (ՌԱԿ) «Զապել Եսայան» կանանց ակումբինն է, իսկ մասնակցում են ինչպես կուսակցական, այնպես էլ համակիր ստեղծագործողները:

«Զապել Եսայան» ակումբի ատենապետ եւ Արմենական-ՌԱԿ վարչության անդամ Գայանե Մուրադյանը նշում է` ցուցահանդեսի համար ի սկզբանե ընտրվեց այնպիսի խորագիր` «Կուսակցական ստեղծագործողներին ասպարեզ», որպեսզի կաղապարներ չստեղծեինք ստեղծագործողների համար: Խորագրի ներքո հավաքվել են մասնակիցներ Երեւանից ու Հայաստանի տարբեր մարզերից, իսկ ցուցահանդես-վաճառքը, որը բացվեց մարտի 9-ին, նվիրված էր կանանց միջազգային օրվան:

«Այս միջոցառումով փորձել ենք փոքր-ինչ լիցքաթափել քաղաքական շիկացած մթնոլորտը, եւ նախընտրական շրջանում հասարակությանը քաղաքական մթնոլորտից տանել դեպի հոգեւորը, որից մեր հասարակությունն իսկապես հեռացել է», ավելացրեց Գայանե Մուրադյանը :

Եվ ինչպես նշեց Արմենական-ՌԱԿ ատենապետ Հակոբ Ավետիքյանը . «Թվում է` կուսակցականները պետք է զբաղվեն միայն քաղաքական ու գաղափարախոսական հարցերով, սակայն մեր կուսակցությունը նաեւ ունի պարտականություն քաջալերելու արվեստի գործիչներին ու ստեղծագործողներին»:

Երիտասարդ ստեղծագործող Նազելի Սարգսյանն էլ ներկայացրել էր գոբելեններ, նրա ընտրած թեմատիկան տարվա եղանակներն են: Թեեւ նրա գոբելեններն առաջին անգամ չեն ցուցադրվում, սակայն Նազելին կարեւորում է եւս մեկ անգամ ցուցադրվելու հնարավորությունը:

Ներկայացված աշխատանքները 40-ն են: Իսկ դրանց արժեվորումը կտա նաեւ գնորդը: Եթե նկարը գնվում է, անկախ իր գնից, դա արդեն հաջողություն է:

Ընդհանրապես, կուսակցության անդամ ու համակիր ստեղծագործողները մարզերում բավականին ակտիվ են, հատկապես Գյումրի ու Վանաձոր քաղաքներում, մարզերում ցուցահանդեսներ եւս կազմակերպվում են:

«Բայց կուզենայինք նրանց գործերը ներկայացնել նաեւ Երեւանի հանրությանը, եւ ինչու ոչ` նաեւ ասպարեզ բացել նրանց համար», հավելում է Հակոբ Ավետիքյանը:

Ցուցահանդեսի բոլոր մասնակիցները կուսակցությունից ստացան շնորհակալագրեր:

Կուսակցության հետ ակտիվ համագործակցելու համար շնորհակալագիր ստացավ եւ Վանաձորի Հայորդյաց տան տնօրեն Թամարա Հարությունյանը, որի սաները իրենց հիանալի ելույթներով ճոխացնում են Լոռու մարզում իրականացվող հրապարակային միջոցառումները:

 Երեկ ՀՀ կառավարության տեղեկատվության եւ հասարակայնության հետ կապերի վարչությունը «Տիգրան Սարգսյանն ընդունել է «ՌԱԿ Կենտրոնական վարչության ատենապետ Մայք Խարապյանին» վերնագրի ներքո հետեւյալ մամլո հաղորդագրությունը տարածեց նախորդ օրը ՀՀ վարչապետի մոտ կայացած ընդունելության մասին: Հաղորդագրությունը հրապարակում ենք նույնությամբ, մեր մեկնաբանությունները վերապահելով մեր առաջիկա համարներից մեկին: Հիշեցնենք միայն, որ Մ. Խարապյանի «կուսակիցներից մեկի» ակնարկությունը վերաբերում է ՀՌԱԿ նախկին ատենապետ, նույնինքն Մ. Խարապյանի գլխավորած վարչության փոխատենապետ, տխրահռչակ Հարություն Առաքելյանին:

Վարչապետ Տիգրան Սարգսյանը փետրվարի 2-ին ընդունել է Ռամկավար ազատական կուսակցության կենտրոնական վարչության ատենապետ Մայք Խարապյանին եւ ՌԱԿ Լիբանանի շրջանային վարչության ատենապետ Հարություն Երկանյանին : Ողջունելով սփյուռքահայ գործիչներինՙ վարչապետը նշել է. «Մենք շահագրգռված ենք, որ ողջ հայության մեջ լինի միասնություն: Դրա համար էլ ստեղծել ենք Սփյուռքի նախարարություն, որի նպատակն է համախմբել համայն հայությանը եւ օժանդակել նրանց բոլոր այն խնդիրների լուծման գործում, որտեղ պետությունը կարող է օգտակար լինել»:

ՌԱԿ ատենապետը, շնորհակալություն հայտնելով հյուընկալության համար, ներողություն է խնդրել Տիգրան Սարգսյանիցՙ իր կուսակիցներից մեկի կողմից վարչապետի հասցեին հնչեցրած անհիմն մեղադրանքների համար: «Առաջին հերթին ցանկանում եմ իմ ներողամտությունը հայտնելՙ Ձեր նկատմամբ ներկայացված անարդար մեղադրանքների համար: Ես շատ խիստ կերպով խոսել եմ: Դժբախտաբար կան մարդիկ, որոնք քաջալերում են նման քայլերը, ամեն մարդ էլ ցանկանում է վարչապետ դառնալ»,- ասել է Մայք Խարապյանը:

Այս կապակցությամբ վարչապետը նշել է. «Մենք ամեն ինչ հասկանում ենք: Ցանկացած իշխանություն շատ լավ գիտակցում է, որ քաղցր կյանք իրեն չի սպասվում, տարբեր տեսակի զրպարտություններ, մեղադրանքներ միշտ էլ լինում են եւ ես հանգիստ եմ վերաբերվում նման բաներին»:

Այնուհետեւ ՌԱԿ ատենապետը վարչապետին է ներկայացրել է կուսակցության առաջիկա ծրագրերը եւ նշել, որ իրենք պատրաստ են համագործակցել հայրենի իշխանությունների հետՙ Սփյուռքում հայանպաստ գործունեությանը նոր թափ հաղորդելու նպատակով:

Զրուցակիներն անդրադարձել են նաեւ մեր երկիր հնարավոր ներդնողների ներգրավմանը, լիբանանահայության եւ սիրիահայության խնդիրներին վերաբերող հարցերի:

 ԵՐՈՒԱՆԴ ԱԶԱՏԵԱՆ, Համաատենապետ

ԲԱԲԳԷՆ ՄԿՐԵԱՆ, Համաատենապետ

Հանրությունը ծանոթ է 2011 թ. դեկտեմբերի 1-ին Հայաստանի Ռամկավար ազատական կուսակցության եւ Արմենական-ՌԱԿ-ի միջեւ կնքված հուշագրին, որով երկու կուսակցությունների միջեւ սկիզբ դրվեց միավորման գործընթացին:

Երկու կազմակերպությունների ղեկավարներըՙ Էդվարդ Անտինյանը եւ Հակոբ Ավետիքյանը, հանդիսավոր պայմաններում հուշագիրը ստորագրելուց հետո հայտարարեցին, որ ստեղծվել է աշխատանքային խառը հանձնաժողովՙ միավորման հետ կապված տարբեր հարցերի համատեղ քննարկման եւ լուծման համար:

Այս տեղեկությունը գոհունակությամբ ընդունվեց ոչ միայն Հայաստանում, այլեւ Սփյուռքի ՌԱԿ բազմաթիվ կառույցներում, որոնք հեռախոսով թե նամակով իրենց աջակցությունը հայտնեցին զույգ ատենապետներին, մեկ անգամ եւս հաստատելով, որ ժամանակը իրոք եկել է վերամիավորման, ՌԱԿ-ը վերստին իր պատմական առաքելության ուղու վրա կանգնեցնելու: Ողջույնի այդ գրերից ստորեւ առանձնացնում ենք կուսակցության ամենակենսունակ շրջանակներից մեկիՙ Մ. Նահանգների Արեւելյան շրջանի ու Կանադայի վարչությունից ստացվածը:

Յարգելի՛ եւ սիրելի՛ ընկերներ.

Բացուող Նոր տարուան սեմին ամէնէն հրճուառիթ նուէրը ձեր երկու կազմերու միացման վճռական որոշումն էր:

Այդ որոշումը եւ անոր գործադրութիւնը պիտի ունենան պատմակշիռ տարողութիւն, կերպով մը ոգեկոչելով 1921-ին ՌԱԿ-ի կազմութեան սրբազան ուխտը: Պատմութիւնը կրկնելու միարարական արարք մը արդարեւ, որ միայն գոհունակութիւն ու լաւատեսութիւն կրնայ ներշնչել մեր սփիւռքի հարազատ ընկերներուն:

Արդարեւ, 1921-ի հոկտեմբեր 1-ին, Պոլսոյ մէջ համախմբուող մեր ազգայնական հոսանքները թէեւ տարբեր կազմերով էին ծառայած մեր ազգին եւ անոր սրբազան դատին, իրար կը զօդուէինՙ միեւնոյն գաղափարական ներշնչումներով եւ իդէալներով: Եւ այդ հիմնադիր ժողովին անոնք համոզուեցան թէ միայն իրարու թիկունք կանգնելով, իրար լրացնելով եւ շարքերը սեղմելով է, որ կրնան սատարել ազգի գոյատեւման եւ պատմական հայրենիքի վերականգնումին:

Վերջին տարիներու ջլատիչ տագնապները միայն կրնան զգօնութեան դասեր հանդիսանալ մեր շարքերուն, որոնք վստահաբար պիտի համախմբուին ձեր շուրջըՙ վերստին ձեզի համար երաշխաւորելու կուսակցութեան պատմական առաքելութիւնը շարունակելու իրաւասութիւնն ու պատիւը:

Վստահ ենք, կորսուած ժամանակները վերստին շահելու վճռականութեամբ, պիտի լծուիք ձեզի յանձնուած ուխտին իրագործման:

Կ՛ուզենք ձեզ վստահեցնել թէ ձեր միասնականութիւնը անխուսափելիօրէն իր կազդուրիչ անդրադարձը պիտի ունենայ նաեւ Սփիւռքի մեր բոլոր կազմերուն վրայ:

Ամերիկայի Արեւելեան շրջանի եւ Գանատայի մեր կազմը, որ կը հանդիսանայ Սփիւռքի ամէնէն ուժական շրջանակներէն մէկը, վերջին տարիներուն միշտ բարձր պահեց հեղինակութիւնն ու վարկը մեր կուսակցութեանՙ կազմակերպչական իր անդուլ աշխատանքներով, ազգային ծրագիրներու իրագործումով եւ իր հեղինակաւոր մամուլի ազդեցիկ դերով: Այսօր այս շրջանակը, ոգեւորուած ձեր օրինակելի նախաձեռնութենէն, ուժերու կրկնապատումով ու նոր թափով պիտի շարունակէ իր առաքելութիւնը:

Յանուն մեր լայն շրջանակի հաւատաւոր անդամակցութեան կու գանք ողջունել ձեզ եւ ձեզի յայտնել մեր ամբողջական զօրակցութիւնը:

Ընկերական սիրալիր զգացումներովՙ

ՌԱԿ Արեւելեան Ամերիկայի ու Գանատայի շրջանային վարչութիւն

2010 թվականը Արմենական-Ռամկավար ազատական կուսակցության (ՌԱԿ) համար հոբելյանական տարի է` հագեցած տարաբնույթ միջոցառումներով: Այս տարի լրանում է Արմենական կուսակցության հիմնադրման 125 տարին, եւ Արմենական տարվա ծրագրերի շրջանակում առանձնակի ակտիվությամբ են հանդես գալիս Արմենական-ՌԱԿ երիտասարդական ակումբի անդամները: Արմենական-ՌԱԿ հանրապետական վարչության եւ ՌԱԿ համաշխարհային խորհրդի անդամ Գայանե Մուրադյանի փոխանցմամբ` տարվա ընթացքում երիտասարդական ակումբի անդամները կազմակերպել են ուխտագնացություն Արագածոտնի մարզում, որտեղ այցելել են յոթ եկեղեցիներ, Մարտունի քաղաքում կազմակերպել են ծառատունկ, տարբեր մանկատներում իրականացրել բարեգործական ծրագրեր: